A necessità d'agisce

Libri anziani, ghjurnali, manuscritti, filmi, bubine, ritratti… site in pussessu di un fuglittinu, unipochi di ducumenti o ancu un fondu sanu à caratteru storicu o patrimuniale annant’à a Corsica ? Sti fondi sò podassi i testimonii d’una pagina scunnisciuta o sminticata di a nostra storia. Hè dunque primurdiale di cunfidà li à a Mediateca Culturale di a Corsica è di i Corsi, dà priservà li è valurizà li. L’imprestu o u versamentu di i vostri ducumenti cuntribuisce à creà un arnese culturale cumunu per e generazioni prisente è future.

Perchè numerizà i vostri ducumenti ? Per cuntribuisce voi dinù à lascià una stampa di e nostre cunniscenze è di a nostra storia à a pusterità, luttendu contru a pussibule sparizione chì minaccia u putenziale culturale è patrimuniale di a Corsica. Participate dinù à ridà un’imaghjina ghjusta è bilanciata di tutte e culture è di tutte e lingue.

U numericu custruisce un patrimoniu durevule, cumunu è apertu à tutti

U numericu face esiste a cunniscenza in ogni parte di u mondu, qualsiasi u sughjettu, qualsiasi a lingua. Numericamente nativi o cunverti sottu à sta forma, i ducumenti versati à a Mediateca Culturale di a Corsica è di i Corsi custruiscenu un vivame di risorze perenne è aperte in u duminiu di a cunniscenza, di a cultura è di u patrimoniu. Favurizendu oramai a so circulazione, u numericu i caccia di una custrizzione troppu pisiva : stà lettera morta in u fondu di un parastagiu polverosu.

Benefizià di a salvezza numerica di i vostri ducumenti

I vostri ducumenti patrimuniali privati sò in mani bone. Da u so imprestitu à a so restituzione, a Mediateca Culturale di a Corsica è di i Corsi favurizeghja un ambiente juridicu è tecnicu per assicurà vi l’usi i più adatti, è per infine una copia numerica indù ci seranu classificati è salvati. Cusì assicuremu à u filu di a nostra dimarchja, certe tappe :

• Una cunvenzione di prestitu chì accerta di u trasfertu di i vostri ducumenti ver’ di a nostra sala di numerisazione, accumpagnata di a tinuta di un rigistru di prestitu firmatu da e duie parte pè ogni spiazziamentu ducumentariu. C’incarichemu di u trasportu di i ducumenti, assicuratu è sottu cundiziunamentu speciale.
• A classifica, l’indicera et a categurisazione di i vostri ducumenti secondu e norme abituale di numerizazione in i nostri lucali, in un spaziu dedicatu è adattu.
• A custruzzione di una basa di dati da accuncià u vostru fondu è d’avè ne accessu di modu efficace.
• L'adopru di un mutore di ricerca efficace è rapidu, messu à u vostru serviziu è chì hà da permette di ritruvà in furia un ducumentu versatu casu mai.
• A restituzione di i vostri ducumenti, o a so cunservazione s`è vo vulete aghjunghje li in a nostra sala di cunsultazione ducumentaria, è quessa in u stessu statu chì quandu ci l’avete cunfidati.
• L'urganizazione, quandu serà necessariu, di un evenimente di valurisazione scentifica pè una restituzione à a sucetà civile isulana.

Unipochi d’esempii di fondi patrimuniali privati annant’à a Corsica chì ci sò stati cunsignati